काठमाडौं। गएको माघमा सवारी चालक अनुमति पत्रको (लाइसेन्स) अनलाइन फारम प्रणाली ह्याक भएको थियो । उक्त समस्याको समाधानका रुपमा यातायात व्यवस्थापन विमागले ‘ओटिपी कोड’को व्यवस्था गर्ने भएको छ ।
ओटिपी कोडको व्यवस्थाले ह्याकको समस्या फेरी नदोहोरिने विभागले जनाएको छ । यस व्यवस्था अनुसार लाइसेन्सको अनलाइन फारम भर्दा ‘सिस्टम’ले स्वचालित रुपमा मोवाइलमा ओटिपी कोड पठाउने छ । त्यो कोड राखेपछि बल्ल फारम प्रकृया पुरा हुने छ ।
नेपालको साक्षरता दर कम हुँदा ओटिपी कोड लागू भएपछि केही झन्झटिलो हुने देखिए पनि ह्याकरहरुले आफुखुसी फारम भर्न भने पाउने छैनन् ।
विभागका आइटी निर्देशक श्रीचन्द्र शाहले हाल यस विषयमा सिस्टम परिर्वतनको काम भइरहेको बताए । उनले यो परिर्वतित प्रणाली चाँडै सञ्चालनमा ल्याइने बताए । ‘हमीले ‘वान टाईम पासवर्ड कन्ट्रोल’ का लागि यो व्यवस्था ल्याउन लागेका हौं, एसएमएस मार्फत कोड आएपछि मात्र फरम पुरा हुनेछ,’ शाहले चाणक्य पोष्टसँग भने ।
उनले पहिल्यै जानकी टेक्नोलोजीसँग म्यासेजको सम्झौता भएको र हाल म्यासेज संख्या बढाएर मात्रै यो सिस्टम लागु गरिने बताए ।
यसमा सेवाग्राहीका लागि खर्च नहुने भएतापनि विभागका लागि एसएमएसको खर्च थपिने उनले बताए ।
