काठमाडौं । आगामी वर्ष २०७९ सालमा कुल ९५ दिन सार्वजनिक बिदा हुने भएको छ । गृह मन्त्रालयले २०७९ सालमा ५२ दिन शनिबार र शनिबारबाहेक थप ४३ दिन गरी ९५ दिन सार्वजनिक बिदा दिने निर्णय गरेको हो।
गृह मन्त्रालयले बिहीबार राजपत्र वैशाख १ गतेदेखि चैत मसान्तसम्म मुलुकभरिका सबै सरकारी कार्यालय तथा सार्वजनिक निकायका लागि हुने बिदाको सूची प्रकाशन गरेको हो ।
२०७९ सालमा ५२ दिन शनिबार र ४३ दिन अन्य बिदा गरी कुल ९५ दिन सार्वजनिक बिदा हुने भएको छ । जसमा २० दिन विभिन्न पर्व बिदा, ६ दिन दशैं बिदा, ५ दिन तिहार विदा, दुई दिन महिला कर्मचारीका लागि मात्र बिदा, एक दिन शिक्षण संस्थाका लागि विदा, ४ दिन काठमाडौं उपत्यकाका लागि मात्र विभिन्न जात्रा बिदा, ३ दिन जन्मजयन्ती बिदा दिइएको छ ।
सरकारले १६ गते फूलपातीदेखि २१ गते द्वादशीसम्म ६ दिन दशैं बिदा, कात्तिक ७ गतेदेखि ११ गतेसम्म ५ दिन तिहार बिदा दिएको छ । त्यसैगरी, सरकारले विश्व मजदुर दिवस, गणतन्त्र दिवस, संविधान दिवस, राष्ट्रिय प्रजातन्त्र दिवस र अन्तर्राष्ट्रिय महिला दिवसमा विदा दिने भएको छ ।
त्यसैगरी, बुद्ध जयन्तीमा देशभर सबैलाई लागूहुने गरी विदा दिने र फाल्गुनन्द जयन्ती, गुरु नानक जयन्तीमा सम्बन्धित धर्मालम्बीहरुलाई मात्रै विदा दिइने भएको छ । त्यस्तै, गौरापर्व, महाशिवरात्री र अन्तर्राष्ट्रिय अपांगता दिवस भने शनिबार परेका छन्।
