काठमाडौं । पोखरा अन्तर्राष्ट्रिय विमानस्थलबाट नियमित अन्तर्राष्ट्रिय उडान सुरु भएको छ । सोमबारदेखि हिमालय एयरलाइन्सले ल्हासा-पोखरा-ल्हासा नियमित उडान सुरु गरेको हो ।
पोखरा विमानस्थल कार्यालयका अनुसार सोमबार ल्हासाबाट १०७ यात्रु लिएर आएको हिमालयकको जहाज पोखरा अन्तर्राष्ट्रिय विमानस्थलमा अवतरण गरेको हो ।
यससँगै हिमालय पोखरामा नियमित अन्तर्राष्ट्रिय उडान थाल्ने पहिलो वायुसेवा कम्पनी समेत बनेको छ । ल्हासाबाट आएको जहाज र यात्रुलाई गण्डकीका मुख्यमन्त्री सुरेन्द्र पाण्डे र नेपालका लागि चिनियाँ राजदूत छेन सङले स्वागत गरेका थिए ।
आज आएको जहाज अब भोलि पोखराबाटै ल्हासा उड्ने विमानस्थल कार्यालयले जनाएको छ । पोखरालाई ल्हासासँग जोड्न हिमालयले अब पोखरा-ल्हासा रुटमा नियमित साताको एक उडान गर्नेछ । यात्रु संख्या बढेसँगै यसलाई विस्तार गरिने एयरलाइन्सले जनाएको छ ।
संचालनमा आएको २ वर्ष बिते पनि पोखरा अन्तर्राष्ट्रिय विमानस्थलबाट नियमित उडान हुन थिएन । यसअघि चार्टर उडान मात्रै हुँदै आएका थिए । हाल सिचुवान एयरलाइन्सले नियमित चार्टर्ड उडान गरिरहेको छ ।
राष्ट्रिय गौरवको आयोजना पोखरा अन्तर्राष्ट्रिय विमानस्थल वि.सं. २०७९ पुस १७ गते उद्घाटन भएको थियो। हालसम्म विभिन्न एयरलाइन्सका ११ चार्टर्ड उडान भएका छन् ।
